«ТАРИХ ЖӘНЕ ГЕОГРАФИЯ» КАФЕДРАСЫ

Мырзабеков Жамбыл Ерғараұлы

PHD философия докторы

E- mail.ru: Бұл электронды пошта мекен-жайы спам-боттардан қорғалған. Көру үшін сіздің браузеріңізде JavaScript қосулы тұруы тиіс.

Мырзабеков Жамбыл Ерғараұлы 1978 жылы туылған, ұлты – қазақ. 1996 жылы Жамбыл облысы, Талас ауданы, Ойық ауылындағы Д.Қонаев атындағы орта мектепті бітірген.

1998 жылыәл-Фараби атындағы Қазақ ұлттық университетінің «Философия және саясаттану» факультетіне оқуға түсіп, 2003 жылы «Философия» мамандығы бойынша бітірді.

Еңбек жолын Қазақ қыздар педагогикалық институтының «Философия және саясаттану» кафедрасында оқытушы болудан бастады.

2005-2008 жылдары бастап А. Ясауи атындағы Халықаралық қазақ-түрік университеті Тараз институтының «Әлеуметтік-гуманитарлық пәндер» кафедрасында аға оқытушы қызметін атқарды.

2008-жылдан бастап Тараз инновациялық гуманитарлық университетінің «Әлеуметтік құқық», кейіннен «Тарих» кафедрасында аға оқытушы, 2014-2017 жылдары М.Дулати атындағы Тараз мемлекеттік университетінде «Философия және саясаттану» кафедрасында аға оқытушы қызметін атқарды.

2004-2007 жылдары әл-Фараби атындағы Қазақ ұлттық университетінің «Философия және саясаттану» факультеті, «Философия» мамандығы бойынша аспирантураның күндізгі бөлімінде оқыды. 2012-жылы әл-Фараби атындағы Қазақ ұлттық университетіне «философия» мамандығы бойынша магистратураны оқып, 2014-жылы тәмамдады.С.ғ.к.,доцент П.Сүлейменовтің ғылыми жетекшілігімен «М.Х.Дулати мұрасының түркі өркениетіндегі орны» тақырыбында магистрлік диссертациялық жұмысын қорғады. Жалпы ғылыми-педагогикалық өтілі – 19 жыл.

2017-2020 жылдары докторантурада оқыған.Академик Ғ.Есімнің ғылыми жетекшілігімен ұлы ойшыл, тұңғыш тарихшы М.Дулатидің шығармашылығы бойынша ғылыми-зерттеу жұмыстарын жүргізіп, 2020 жылы докторлық диссертациясын табысты қорғап, ғылыми атағын иеленді.

2013 жылы Чехия Республикасында Оломуц университетінде, 2019 жылы Туркия Республикасының Гази университетінде ғылыми тағылымдамадан өткен. Тараз қаласы әкімінің алғыс хатымен, институт ректорының алғыс хаттарымен марапатталған. Ж.Е. Мырзабеков өз еңбек жолында ғылымнан қол үзген емес. 40-қа жуық ғылыми-зерттеу мақалаларының авторы, халықаралық, республикалық көлемінде ұйымдастырылатын ғылыми конференцияларға ұдайы қатысып отырады. Ғылыми-зерттеу мақалалары жоғары аттестаттау комитеті ұсынған басылымдарда, бірнеше мақалалары халықаралық журналдар мен Скопус базасындағы импакт факторлы көрсеткіші бар шетелдік басылымдарда жарық көрген.

2016 жылы Эверо баспасынан жарық көрген «Түркі өркениетінің мәдени-тарихи құндылықтарын зерттеу негіздері» атты оқу құралы мен 2020 жылы жарық көрген «Философиялық дүниетаным және ойшылдар шығармашылығы» атты монографиясы жоғары оқу орындарының оқу үрдісінде сұраныспен қолданылуда. Бүгінгі таңда Ж.Мырзабеков өз ғылыми-зерттеу мақалаларында отандық пәлсапа, ұлттық руханият, діни тұрақтылық мәселесіне ден қойып келеді. Өз қызметіне адал, әрі үлкен жауапкершілікпен қарайды, кафедра, факультет, институттың, қала мен облыстың қоғамдық өміріне белсенді атсалысады. Ж. Мырзабеков елімізде жүргізілген «Болашаққа бағдар: рухани жаңғыру», «Ұлы даланың жеті қыры» атты мемлекеттік бағдарламаларының орындалуына, Мемлекет басшысы Жолдауларының толыққанды насихатталуына қызу араласып, осы мәселеге қатысты республикалық деңгейдегі іс-шараларға қатысады, жұмыс тобының тұрақты мүшесі. Жамбыл Ерғараұлы студенттер мен жас оқытушылар, магистрлерге үнемі ғылыми бағыт-бағдар көрсетіп отыратындықтан жоғары беделге ие. Ж.Мырзабековтің ғылыми жетекшілігімен мектеп оқушылары мен институт студенттері облыстық, республикалық ғылыми жобаларда жүлделі орындарды иеленді. Сонымен қатар, ғалым жалпы білім беретін мектептердің 10-11 сынып оқушыларына арналып дайындалған, Жамбыл облысы мектептерінде арнайы оқытылатын «Шерхантану» курсының оқу бағдарламасының авторларының бірі. Институтта орындалатын «Жамбыл облысының киелі жерлерін тарихи-географиялық тұрғыдан зерттеу негіздері» атты перспективалық жобаның жетекші орындаушысы. Институтта дайындалатын барлық білім беру бағдарламалары бойынша міндетті пән - Философияны оқытатын жетекші маман. «Тарих» білім беру бағдарламасының модульдік бағдарламасын әзірлеуші. Пәнді оқытуда болашақ мамандардың тұлғалық қалыптасуына, рухани жетілуіне, бәсекеге қабілетті, креативті ойлай алуына мүмкіндіктер жасауды басты мақсат етіп келеді. Ж.Е.Мырзабеков – әріптестеріне сыйлы, үнемі кәсіби біліктілігін жетілдіріп отырады, оқу үрдісіндегі жаңаша технологияларды өздігінше қолданып, жетілдіре біледі, жауапкершілігі мол маман.