2021 жылдың 13 мамыр күні Халықаралық Тараз инновациялық институтында «Филология» кафедрасының ұйымдастыруымен Туркология саласының білікті маманы, ҚР Білім және ғылым министрлігі ЖОО-ның «Үздік оқытушысы» грантының иегері, Аймақтық Менеджмент академиясының профессоры, филология ғылымдарының кандидаты, доцент Кәрібаева Азиза Өтегенқызының «ЛИНГВИСТИКАНЫҢ ӨЗЕКТІ МӘСЕЛЕЛЕРІ» атты тақырыптағы ғылыми-әдістемелік семинары өткізілді.

Ғылыми-әдістемелік семинарды «Филология» кафедрасының доценті, ф.ғ.к. Пертаева Эльмира Құлибайқызы жүргізді.

Ғылыми-әдістемелік семинарға Халықаралық Тараз инновациялық институтының «Ғылым, инновация және халықаралық байланыстар» жөніндегі проректоры, э.ғ.д., профессор Тәжібаев Серік Дүйсенәліұлы, №38 орта мектебінің мұғалімдері Андакулова Динара, Бисенғалиева Мадина, №21 орта мектебінің мұғалімі Шаханов Қайрат, «Филология» кафедрасының профессор-оқытушылары мен студенттері қатысты.

Ғылыми әдістемелік семинарда сыртқы лингвистика, ішкі лингвистика, сөйлеу лингвистикасы жайындағы зерттеулер мен терминдер мәселесі жан-жақты қарастырылды. Әсіресе, Кәрібаева Азиза Өтегенқызы когнитивті лингвистика – тіл білімінің жаңа бағыттарының бірі антропоцентристік парадигмаға тоқталды. Когнитивтік лингвистика тілдің танымдық табиғи болмысын зерттейтін ғылым. Қазіргі тіл ғылымында когнитивті лингвистика қатты дамып, оның салалары категориялау теориясы, тілдік тұлға, концептуалды метафора, когнитивті–дискурсивті теория, когнитивті семантика, тағы басқалары сараланып кетеді. Когнитивтік лингвистика сияқты психолингвистика, этнолингвистика, соцлингвистика ғылымдарының пайда болуы тіл білімінде үлкен өзгеріс тудыратыны жайлы қамтып өтті.

Студенттер тарапынан сұрақтар қойылып, тың жауаптар алынды.

2021 жылы мамыр айының 19-26 күндер аралығында Алматы қаласында Қазақстан Республикасының жағажай волейболынан IX жазғы Универсияда ойындары өтеді. Аталған іс-шараға Халықаралық Тараз инновациялық институтының спортшы студенттері қатысады. Оның ішінде :

Запар Арайлым Дш 18-1

Қалмахамбет Ақбота Шт-20-1

Мейрамбек Нұрдаулет БӘД 17-1

Әсілхан Мәди Дш 17-3

Сметов Бағлан Дш 17-3

Топар Нұрперзент Дш 18-1 тобының білімгерлері. 

Спортшыларымызға сәттілік тілейміз! Жеңісті күндер көп болсын! 

Имидждік жұмыстар және қоғаммен байланыс секторы

Жамбыл Жабаевтың 175 жылдық мерейтойының аясында ХТИИ «Шерхантану және Рухани жаңғыру» ғылыми-зерттеу орталығы «Мен – қырағы сұңқармын, мен – елімнің әуені...» атты облыстық жас ақындар мүшәйрасын жариялаған болатын. Бүгінгі күні жыр додасы өзінің мәресіне жетіп, жеңімпаздар анықталды. Мүшәйраға облысымыздың білім ордаларынан барлығы 32 өлең-жыр келіп түсті. Албырт жастардың, жас ақындардың, ақынжанды оқушылардың шығармаларын Халықаралық Тараз инновациялық институты «Қазақ тілі мен әдебиеті» кафедрасының меңгерушісі, филология ғылымдарының кандидаты, доцент Рабиға Ағабекқызы Беркенова төрағалық жасап, кафедраның профессор-оқытушылары талдап, ой елегінен өткізіп, қорытындылады.

Олай болса, жыр додасының жеңімпаздары:

Бас жүлде – Тараз қаласы, Керімбай атындағы № 12 мектеп-гимназиясының оқушысы Ержан Аянат; жетекшісі: Шалдыбаева Гүлзейнеп.

І орын – Жамбыл облыстық дарынды балаларға арналған мамандандырылған «Дарын» мектеп-интернатының 11-сынып оқушысы Сайлаубек Зарина; жетекшісі: Сейтжанова Гүлафрез.

ІІ орын – Байзақ ауданы, Ғ.Мұратбаев атындағы гимназияның 9-сынып оқушысы Искаков Сәбит; жетекшісі: Жумагулова Гүлжайнар.

ІІІ орын – Меркі ауданы, Әмеди Хасенов атындағы №11 ЖОББМ-нің 10-сынып оқушысы Құлмаханбетқызы Бибінұр; жетекшісі: Айткулова Асылзада.

Жеңімпаздардың дипломдары мен сыйлықтарын Халықаралық Тараз инновациялық институтының бірінші проректоры, тарих ғылымдарының докторы, профессор Асқар Абдуалы жылы лебізін білдіре отырып табыстады. Болашақ ақындарға шалқар шабыт тілеп, жетекшілеріне алғысын айтты.

Мұсылман қауымының ұлық, қастерлі мерекесі – Ораза айт мейрамының басталуымен құттықтаймын. Ораза айт – мейірімділіктің, игіліктің, бірліктің, ізеттіліктің, қайырымдылықтың мерекесі. «Айт» сөзі – «мерекелеу», «хал сұрасу», «бір-бірін қуанту», «қуанышқа топталу» деген мағыналарды білдіреді.

Ораза айт мерекесі құтты болсын! Қасиетті айда жасаған әрбір қайырлы амалдарымыз, берген зекет пен пітір садақаларымыз қабыл болып, мол сауаптан жазғай!

Әрбір отбасына амандық, жақсылық, дендеріңізге саулық, жұмыстарыңызға береке тілеймін! Баршамызды рамазаннан рамазанға дейін аман-есен жеткізе берсін!

Еліміз аман, жұртымыз тыныш, Тәуелсіздігіміз баянды болғай!

Ізгі тілекпен, ректор Ерболат Саурықов

Халықаралық Тараз  инновациялық институтының «Шығармашылық мамандықтар» факультеті ақын Жамбыл Жабаевтың 175-жылдық мерей тойына арналған ІІ-дәстүрлі облыстық «Өлке өркениеті» тақырыбында жас суретші-шеберлер байқауын өткізді. Байқауды өткізудің мақсаты, жас суретші-шеберлердің ой зердесімен, көзімен, туған жердің табиғатын, өркениеттік сипатын бейнелеу, талантты жастардың әсемдікті көркемдеп сезіне білу ерекшеліктерін танытып, олардың шығармашылық бастамасына қолдау көрсету болды. Байқауға 17-19 жас аралығындағы мектеп,  арнаулы орта және жоғары білім беру мекемесінің білім алушылары жас ерекшелігіне байланысты екі топқа  бөлініп 14-16 жас және 17-19 жас аралығында қатысты. Байқауға бейнелеу өнерінің салалары живопись, графика, мүсін, қолданбалы қолөнер, көркем фото, дизайн және үздік үй тапсырмасы номинациялары бойынша қала, аудан мектептерінің оқушылары  мен ЖОО-ның студенттері қатысып, жүлделі  орындар және сертификаттармен, жетекшілері алғыс хаттармен  марапатталды.  Аталған жүлделі орындардың номинациясы бойынша ҚР суретшілер одағының мүшесі М.М Егизеков. марапаттады.
Сонымен қатар байқауға Халықаралық Тараз инновациялық институтының  «Көркем еңбек және сызу» мамандығының бітіруші 4 курс  студенті, «Ажур» шығармашылық студиясының  көркем өнер жетекшісі Ахметова Наргиза балалардың шығармашылық  жұмыстарының көрмесін көпшілік  назарына таныстырды.