"Sherkhan students life" апталығы аясында факультетаралық «Жайдарман» ойыны өтті

Ш.Мұртаза атындағы Халықаралық Тараз инновациялық институтында өткен “Sherkhan students life” апталығы аясында факультетаралық маусымашар «Жайдарман» ойыны жоғары деңгейде ұйымдастырылды. Бұл сайыс студенттердің шығармашылық әлеуетін ашуға, ұжымдық рухты күшейтуге және достық байланыстарды нығайтуға бағытталды. Ойын кеші әртүрлі факультеттердің ең тапқыр, ең креативті студенттерін біріктіріп, көрермендерге ерекше көңіл күй сыйлады.

Ойында бақ сынаған командалар:

1 “Боранды” еркін құрама командасы

2 “Метеорит” құрама командасы

3 “OSI” құрама командасы

4 “Дала Сити” құрама командасы

5 “Жас пед” құрама командасы

6 “МЕДИЯ” командасы

Әр команда әзіл-қалжың арқылы қоғамдағы өзекті мәселелерді көтеріп, студенттердің өмірінен алынған қызықты оқиғаларды сахнада шеберлікпен көрсетті. Ойын барысында командалар көрермендерді күлкіге бөлеп, өнерлерімен тәнті етті. Әрбір команда ерекше әзірлікпен шығып, креативтілік пен тапқырлықтарын көрсетіп, бар күш-жігерлерін ортаға салды.

Сайыстың қорытындысында әділқазылар алқасының шешімімен ең жоғары ұпай жинаған “Боранды” еркін құрама командасы ауыспалы кубокты жеңіп алды. Бұл команда өздерінің шеберлігімен, әзілдерінің өткірлігімен және көрермендерді баурап алу қабілетімен ерекше көзге түсті. “Боранды” еркін құрама командасының жеңісі – олардың табанды еңбегі мен ұжымдық бірлігінің айқын нәтижесі.

Жеңімпаз команда мүшесі, Мадияр Бегім, ойынды қалай өткергені және жеңістен алған әсері туралы ой бөлісті:

“Жайдарманға дайындық біз үшін қызықты болды. Көп уақыт пен еңбекті талап етті. Әр дайындықта жаңа әзілдерді әзірлеп, көрермендерді қуантатын ерекше сәттерді жасауға тырыстық. Біздің мақсатымыз тек жеңіс емес, ең алдымен, көрермендерге шынайы күлкі мен жағымды көңіл-күй сыйлау болды. Командамыздың бірлігі мен тапқырлығы бізді жеңіске жеткізді деп ойлаймын. Осы кубокты жеңіп алу – барлығымыз үшін үлкен жетістік, алдағы ойындарда да жақсы өнер көрсетуге ұмтыламыз,” – деді Мадияр.

Барлық командаларға өз өнерлерін жоғары деңгейде көрсеткені үшін ризашылық білдіреміз. Әрбір қатысушы өзінің қайталанбас харизмасымен және ерекше ойларымен көрермендерге қуаныш сыйлады. Осы маусымашар ойын жастардың шабыты мен шығармашылық әлеуетін одан әрі арттыруға, достық байланыстарды нығайтуға үлкен үлес қосты.