Белгілі түркітанушы ғалым Алтай Аманжоловтың 90 жылдығына арналған халықаралық конференция өтті

2024 жылдың 11 желтоқсанында Өскемен қаласындағы Қазақстан-Американ еркін университетінде белгілі түркітанушы ғалым, ұлы халықтың дара тұлғасы Алтай Сәрсенұлы Аманжоловтың 90 жылдығына арналған халықаралық ғылыми-танымдық конференция өтті.

Бұл маңызды шараны Шығыс Қазақстан облысы әкімдігі, Ұлан ауданы әкімдігі және «Кетбұқа-Төлегетай» халықаралық қоғамдық қоры ұйымдастырды. Конференцияға Түркия, Өзбекстан, Қырғызстан және еліміздің көптеген жоғары оқу орындарының ғалымдары қатысып, жалпы түркі мәдениетінің өзекті мәселелері мен Алтай Аманжоловтың ғылымға қосқан үлесіне арналған баяндамалар жасады.

Халықаралық Тараз университеті конференцияда Қазақстан-Американ еркін университетінің ұжымын 30 жылдық мерейтойымен құттықтап, естелік сыйлықтарын табыстады. Сонымен қатар, Шерхан Мұртаза университетінде ғалымның атына арнайы кабинет ашылғаны және Алтай Аманжоловтың мерейтойы бірнеше қалада халықаралық деңгейде аталып өткендігі туралы айтылды. Университетіміздің құрылтайшысы Ерболат Саурықовтың конференция қатысушыларына арнайы жолдаған құттықтауы оқылды.

Конференцияда университетіміздің ғалым хатшысы Қаракөз Тамабекова да сөз сөйлеп, Алтай Аманжоловтың түркітану ғылымындағы еңбегіне қатысты құттықтауын жеткізді. Ол ғалымның қазақ тілі мен түркі мәдениетін дамытудағы рөлін ерекше атап өтіп, мұндай ғылыми шаралардың маңыздылығын атап өтті.

Конференция барысында ғалымдар түркі мәдениеті мен тіл білімі саласындағы маңызды мәселелерді талқылап, Алтай Сәрсенұлы Аманжоловтың түркітану ғылымындағы рөлін ерекше атап өтті. Бұл ғылыми басқосу түркі халықтарының ортақ мұрасын дәріптеп, болашақта оны зерттеу мен дамытуға бағытталған көптеген бастамаларға негіз болатыны анық.

Алтай Сәрсенұлы Аманжоловтың 90 жылдығына арналған бұл халықаралық конференция түркі әлемінің мәдени және ғылыми мұрасына терең бойлауға мүмкіндік беріп, ғалымның еңбегінің маңыздылығын тағы бір мәрте көрсетті. Шерхан Мұртаза атындағы Халықаралық Тараз университеті түркі мәдениеті мен ғылымын дәріптеуге бағытталған осындай бастамаларды әрдайым қолдайтынын атап өтті.

Шерхан Мұртаза атындағы Халықаралық Тараз университетінің баспасөз қызметі