Шерхан Мұртаза университетінің студенті Зейнеп Оразхан Индонезияда өткен GAMMA WORLD MMA—дан Әлем чемпионы атанды

Индонезияда өткен халықаралық GAMMA WORLD MMA чемпионатында Шерхан Мұртаза атындағы Халықаралық Тараз университетінің студенті Зейнеп Оразхан топ жарып, чемпион атанды. Бұл жеңіс – еліміздің спорты үшін ғана емес, университетіміз үшін де үлкен мақтаныш.

Зейнеп Оразхан – өз саласында биік белестерді бағындырып жүрген дарынды спортшы. Чемпионатта ол өзінің жоғары деңгейдегі шеберлігін, табандылығы мен қайсарлығын көрсетіп, қарсыластарының бәрінен басым түсті. Әлемнің түкпір-түкпірінен келген мықты спортшылар арасында Зейнеп Қазақстанның абыройын асқақтатып, ел намысын лайықты қорғады.

Университетіміз үшін бұл жеңіс – студенттеріміздің жан-жақты дамуы мен олардың халықаралық аренадағы жетістіктерінің дәлелі. Зейнептің жеңісі спорттық рухтың, тынымсыз еңбектің және нағыз көшбасшылық қасиеттердің жарқын көрінісі болып табылады.

Шерхан Мұртаза университетінің ректоры Махметғали Сарыбеков Зейнепті жеңісімен құттықтай отырып:

“Біздің студентіміздің әлемдік деңгейде ел намысын қорғап, чемпион атануы – тек университетіміздің ғана емес, бүкіл еліміздің мақтанышы. Зейнептің жетістігі жас ұрпаққа үлгі болып, алға ұмтылуға шабыт береді. Бұл жеңіс студенттеріміздің біліммен қатар, спортта да биік шыңдарды бағындыра алатынын дәлелдейді” деп атап өтті.

Зейнеп Оразханның жеңісі бізді одан әрі жаңа белестерді бағындыруға жігерлендіреді. Алдағы уақытта оған спорттық мансабында тек сәттілік пен жаңа жеңістер тілейміз!