Кәсіби бағдар беру шарасы Жамбыл ауданында жалғасты

Бүгін Жамбыл ауданы, Аса ауылындағы "Өнер" мектебінде мектеп түлектері мен жоғары сынып оқушыларына арналған кәсіби бағдар беру шарасы жалғасын тапты. Бұл іс-шара жастарға болашақ мамандығын таңдауға бағыт-бағдар беріп, олардың жоғары білім алу мүмкіндіктерімен таныстыру мақсатында өткізілді.

Шара барысында алдымен Шерхан Мұртаза атындағы Халықаралық Тараз университеті туралы арнайы дайындалған бейнеролик көрсетілді. Оқушылар оқу орнының материалдық-техникалық базасымен, білім беру бағдарламаларымен және студенттерге жасалған мүмкіндіктермен танысты.

Жиында университет ректоры Махметғали Сарыбеков сөз сөйлеп, оқу орнының заманауи бағдарламалары мен студенттерге арналған мүмкіндіктер жайында айтып өтті. Ректор баяндамасы оқушыларды болашаққа нық қадам жасауға жігерлендірді десек болады.

Университет түлегі, Жамбыл ауданы әкімінің баспасөз хатшысы Ақжігіт Жетпісбай кездесуге арнайы қатысып, өзінің кәсіби жолы мен университетте алған білімі туралы баяндама жасады. Ол түлектерге дұрыс мамандық таңдаудың маңыздылығын түсіндіріп, өз тәжірибесімен бөлісті.

Іс-шара барысында университеттің өнерлі жастары дайындаған концерттік бағдарлама ұсынылды. Сондай-ақ, жастардың көңілін көтеру мақсатында түрлі ойындар ұйымдастырылды.

Шара соңында оқушыларға университет туралы ақпараттық брошюралар таратылып, болашақ мамандықтарын таңдауға қажетті мағлұматтар ұсынылды. Бұл іс-шара түлектерге сенімді қадам жасауға шабыт бергені сөзсіз.