Студенттер нар тұлғаның мекенінде

Бүгін Ш.Мұртаза атындағы Халықаралық Тараз инновациялық институты әкімшілігінің қолдауымен «Шерхан апталығының» аясында Халық жазушысының туған күніне орай оқу ордасының 50 белсенді студенті Жуалы ауданының Талапты елді мекенінде орналасқан Ш.Мұртазаның мемориалдық үйіне барып, қайраткердің өмірі мен шығармашылығына байланысты тың рухани дүниелерімен сусындап қайтты.

Мемориалдық үйдегі қаламгердің жеке кітапханасымен, жұмыс кабинетімен, бильярд залымен, жеке қолданған заттарымен, өміріне байланысты маңызды құжаттарымен танысып, өздерін қызықтырып жүрген сұрақтарына байланысты жауаптарын алды.

Сонымен қатар, мемориалдық үйдің ауласында  «Шерхан апталығының» аясында ұйымдастырылған үздік пост байқауының қорытындысы бойынша жеңімпаздар марапатталып, бағалы сыйлықтар тапсырылды.

Осыдан соң студенттер Б.Момышұлы ауылында орналасқан даңқты қолбасшы Бауыржан Момышұлының мұражайына да ат басын бұрды. Ер Бәукенің қолданған дүниелері мен маңызды құжаттарымен танысып, батырдың ерлік рухымен танысты.

Соңында Халық жазушысына Құран бағышталып, студенттер қол жайды. Студенттер оқу ордасының басшылығына ерекше алғысын білдіріп, Шерағаның туған күніне орай рухани байып қайтқандарын тілге тиек етті.