ХТИИ студенті әлемдік аренада күміс жүлдеге қол жеткізді

Шерхан Мұртаза атындағы Халықаралық Тараз инновациялық институтының студенті, “Жамбыл бокс клубының” өкілі Көшербай Асылхан Қадырханұлы АҚШ-тың Колорадо штаты, Денвер қаласында өткен бокстан жастар арасындағы Әлем чемпионатында күміс жүлдеге ие болды. Жас спортшы халықаралық дәрежедегі спорт шебері нормативін орындап, ел намысын абыроймен қорғады.

Асылхан чемпионат барысында Чехия, АҚШ, Украина секілді елдердің тәжірибелі спортшыларын жеңіп, финалға жолдама алды. Ақтық сынға дейінгі жекпе-жектерде оның шеберлігі мен қажырлығы көрініп, үздік спортшы ретінде көзге түсті. Финалдық кездесуде де қарсыласы – Австралия спортшысынан басымырақ болып тұрса да, төрешілер жеңісті Асылханға бұйыртпады. Соған қарамастан, оның жеңіске деген ұмтылысы мен елімізге деген сүйіспеншілігі спорт сүйер қауымды қуантты.

Айта кетейік, Асылханның бұл жетістігі – Жамбыл облысы үшін де үлкен мақтаныш. Соңғы 18 жылда бокстан жастар арасындағы Әлем чемпионатында алғаш рет күміс медаль жеңіп алынғаны – өңіріміздегі спорттың қарқынды дамып келе жатқанының айқын көрінісі.

Асылханның бұл жетістігінде оның бапкері, ҚР спорт шебері Әлімбаев Мақсаттың еңбегі зор. Ол шәкіртінің әр қадамынан қолдау көрсетіп, алға жетелеп, жеңіске жету жолында үлкен үлесін қосты.

Бүгінгі күні еліміздің, оның ішінде Тараз өңірінің аты әлемдік аренада танылып, спортшыларымыздың жеңістері арқылы Қазақстанның абыройын асқақтатып отыр. Алдағы уақытта Асылханның одан әрі биік белестерді бағындыратынына сенеміз.