«Sherkhan Fest – 2024» студент қатарына қабылдау кеші

Кеше Шерхан Мұртаза атындағы Халықаралық Тараз инновациялық институтында дәстүрлі "Sherkhan Fest - 2024" студент қатарына қабылдау кеші өтті. Мерекелік шараның шымылдығын институт ректоры Махметғали Сарыбеков алғы сөзімен ашты. Ол студенттерді жаңа оқу жылымен құттықтап, институт қабырғасында алар білімдерінің олардың болашағына үлкен жол ашатынын атап өтті. Ректор білім мен ғылымның қазіргі қоғамдағы маңызды рөлін, жастардың кәсіби және тұлғалық дамуға деген ұмтылысының маңыздылығын ерекше атап, студенттерді белсенділік танытуға, жаңашыл идеяларды іске асыруға және институт өміріне белсене қатысуға шақырды.

Іс-шараның құрметті қонағы ретінде Облыстық жастар ресурстық орталығының директоры Айбек Қадралиев те сөз сөйлеп, жастардың қоғамдағы рөлін ерекше атап өтті. Сонымен қатар, студенттік ректорат мүшелеріне куәліктер табысталып, жаңа оқу жылында студенттердің белсенділігі мен шығармашылығы жоғары бағаланды.

Кеш барысында белсенді жастар ән шырқап, жұлдызды қонақтар, атап айтсақ облысқа танымал «Асау», «Сармат» топтары да өз өнерлерін көрсетті. Мерекелік концерт студенттерге көтеріңкі көңіл-күй сыйлап, ұмытылмас сәттерге толы болды. Іс-шара соңы би кешіне жалғасты.