Шерхан институты мен Тараз инновациялық көпсалалы колледжі ынтымақтастықты нығайтуда

Бүгін Шерхан Мұртаза атындағы Халықаралық Тараз инновациялық институтының бас ғимаратында ректор Махметғали Сарыбеков колледж студенттерімен кездесу өткізді. Кездесудің басты мақсаты – Тараз инновациялық көпсалалы колледжінің студенттерін институтпен жақын таныстырып, болашақта оқуын осы білім ордасында жалғастыруға ынталандыру болды.

Кездесу барысында институт туралы арнайы деректі фильм көрсетілді. Бұл фильмде оқу орнының тарихы, миссиясы, жетістіктері және студенттерге ұсынатын мүмкіндіктері жан-жақты баяндалды. Көрсетілім колледж студенттеріне институттың оқу үдерісі мен табыстары туралы тереңірек мағлұмат берді.

Фильмнен кейін ректор сөз сөйлеп, институттың қазіргі жағдайы, даму бағыттары және студенттерге арналған ерекше мүмкіндіктері туралы айтып берді. Ол студенттерді білімін Шерхан Мұртаза атындағы Халықаралық Тараз инновациялық институтында жалғастыруға шақырып, институттың ғылыми-зерттеу жобалары, білім беру бағдарламалары және жастарға арналған түрлі қолдау бағдарламалары туралы баяндады. 

Кездесудің қорытындысында институт президенті Нұржан Муслимов мырза мен Тараз инновациялық көпсалалы колледжінің директоры Ляззат Мырзабекова екіжақты ынтымақтастық туралы меморандумға қол қойды. Бұл құжат білім беру сапасын арттыру, тәжірибе алмасу және ғылыми-зерттеу жұмыстарын бірлесіп дамыту бағытындағы ынтымақтастықты нығайтуға бағытталған маңызды қадам болды.