«Үздік студенттік деканат-2024» байқауының жеңімпаздары анықталды

12 қараша күні Шерхан Мұртаза атындағы Халықаралық Тараз инновациялық институтында Халықаралық студенттер күніне орай «Үздік студенттік деканат - 2024» факультетаралық байқауы өтті. Байқаудың негізгі мақсаты — жастардың өзін-өзі басқару құрылымын нығайту, көшбасшылық қасиеттерін дамыту және факультеттер арасындағы байланысты арттыру болды.

Байқауға қатысушы факультеттер төрт түрлі кезеңнен өтіп, өздерінің білімдерін, өнерлерін және шығармашылықтарын ортаға салды:

1. “Мамандығым – мақтанышым” (Таныстыру кезеңі): Топтар өз факультеттерінің мамандықтарын сахналандырылған көрініс немесе ән арқылы таныстырып, білім-ғылым мен өнер жолындағы жетістіктерін көрсетті.

2. “CREATIVE JAS” (Өнер байқауы): Командалар өздерінің креативті идеяларымен ерекшеленді. Жаңашылдық пен өзектілікке баса назар аударылып, топтық өнерлері көрсетілді.

3. “INTELLECT JAS” (Сұрақ-жауап): Бұл кезеңде команда капитандары интеллектуалды сұрақтарға жауап беріп, өз білімдері мен жылдамдықтарын сынады. Дұрыс әрі нақты жауап берген капитандар жоғары балл жинады.

4. “QUEST” (Квест ойыны): Квест ойыны барысында командаларға арнайы тапсырмалар беріліп, олар жасырынған конверттер арқылы бағыт-бағдар алды. Бұл ойын командалардың шапшаңдығын және ұжымдық әрекет ету қабілетін байқатты.

Ал, қазылар алқасының құрамына келер болсақ, баға берушілер қатарында:

• Институттың тәрбие және әлеуметтік жұмыстар жөніндегі проректоры, қазылар алқасының төрайымы - Гүлшат Құлабекова

• «Сапа, аккредиттеу және рейтинг» басқармасының басшысы –Ботагөз Жундибаева

• Жамбыл облысы әкімдігінің ақпарат және қоғамдық даму басқармасының «Жастар ресурстық орталығы» директоры –Айбек Қадралиев

• Жамбыл облысы әкімінің баспасөз қызметінің қызметкері – Диана Қалманбаева болды.

Қазылар алқасының әділ бағалау нәтижесінде жеңімпаздар төмендегідей анықталды:

1. «Үздік студенттік деканат-2024» атағын «Педагогика» факультеті жеңіп алып, 50 000 теңге сыйақы иеленді.

2. «Заң» факультеті белсенді қатысқаны үшін алғыс хатпен марапатталып, 30 000 теңге сыйақы алды.

3. «Шығармашылық мамандықтары» факультеті де белсенділігі үшін алғыс хатпен марапатталып, 30 000 теңге иеленді.

4. «Жаратылыстану» факультеті де дәл солай белсенділігі үшін алғыс хат пен 30 000 теңге сыйақы алды.

5. «Экономика және бизнес» факультеті де алғыс хат пен 30 000 теңге сыйақымен марапатталды.

Бұл байқау студенттердің шығармашылығын, көшбасшылық қабілеттерін және командалық жұмыс істеу дағдыларын дамытуға арналған тамаша мүмкіндік болды. Жеңімпаздарды шын жүректен құттықтаймыз, ал барлық қатысушыларға алдағы уақытта да сәттілік тілейміз!