Жастар арасында СПИД-тің алдын алу: ақпараттық дәріс ұйымдастырылды

Шерхан Мұртаза атындағы Халықаралық Тараз инновациялық институтында студенттерге арналған маңызды ақпараттық шара өткізілді. «Экономика және бизнес» факультетінің 1-4 курс студенттері мен «Педагогика» және «Шығармашылық мамандықтар» факультетінің 1-3 курс студенттері үшін СПИД (ЖИТС) індетінің алдын алу тақырыбында дәріс оқылды.

Шараның негізгі мақсаты — жастар арасында қауіпті дерттің алдын алу, оның таралу жолдары мен салдарын түсіндіру арқылы денсаулыққа жауапкершілікпен қарауды насихаттау.

Дәрісті Жамбыл облыстық ЖИТС орталығының тәжірибелі дәрігер-эпидемиологы Индира Досымова жүргізді. Лекция барысында студенттерге иммун тапшылығы вирусының таралу жолдары, қорғану шаралары, сондай-ақ, салауатты өмір салтын ұстанудың маңыздылығы туралы толық ақпарат берілді. Тыңдаушылар дәріс барысында белсенділік танытып, өздерін қызықтырған сұрақтарға жауап алды.

Шараны ұйымдастыруға жауапты институт медбикесі Айгерім Асылханова студенттердің ақпаратты толыққанды қабылдауы үшін жағдай жасап, дәрісті жоғары деңгейде өткізуге үлес қосты.

Мұндай кездесулер жастардың өз денсаулығына мән беріп, қауіпті дерттің алдын алу бойынша ақпараттануын арттыруда маңызды рөл атқарады. Институт басшылығы денсаулық сақтау тақырыбында алдағы уақытта да түрлі шараларды ұйымдастыруды жалғастыруды жоспарлап отыр.

Бұл шара жастардың салауатты өмір салтын насихаттап, олардың өмірлік құндылықтарға деген көзқарасын жақсартуға бағытталған маңызды қадам болды.