Халықаралық Тараз инновациялық институтының ғылым, инновация және халықаралық байланыстар проректоры, профессор, экономика ғылымдарының докторы ТӘЖІБАЕВ СЕРІК ДҮЙСЕНАЛЫҰЛЫ 70 жасқа толып отыр.

Тәжібаев Серік Дүйсеналыұлы 1951 жылы 1 мамырда Жамбыл облысы Луговой ауылында дүниеге келген. 1974 жылы Алматы Халық шаруашылығы институтын бітірді.

Банк, білім және ғылым саласында көптеген жылдар бойын ерен еңбек етуде. Атап айтсақ, Жамбыл облысы Мемлекеттік банкінің Бас бухгалтериясында механизация есебін жүргізу бойынша аға инженер, Мемлекеттік банктің Қазақ республикалық кеңсесінде Өндірістік бюро басшысының орынбасары, Оңтүстік өңірінің ЖОО декан, проректор қызметтерін атқарды. 2019 жылдың қыркүйек айынан бастап Тараз инновациалы-гуманитарлы университеті ғылым, инновация және халықаралық байланыстар проректоры қызметін атқаруда.

2004 жылы АҚШ-тың Индиана университетінде оқу және ғылымы тағлымдамасын өтті (ақпан-маусым).

2007 жыл мен 2010 жыл аралығында Тәжібаев С.Д. А.Яссауи атындағы ХҚТУ-дегі Д 14.61.15 диссертациялық кеңесінің төрағасы болып табылды.

«Ғылымның өсуіне атсалысқаны үшін» (2003ж.), «ҚР білім беру ісінің құрметті қызметкері» (2008ж.), «Ы. Алтынсарин» (2018ж.) Қазақстан Республикасы БҒМ белгілер иегері. «2014 жылдың жоғары оқу орнының үздік оқытушысы» атағының иегері атанды.

Мерей той иесін құттықтай отырып, ұзақ ғұмыр, денсаулық, отбасында бақыт, білім және ғылым жолында шығармашылық табыстар тілейміз. 

ХТИИ ұжымы

Халықаралық Тараз инновациялық институтында "Жарқын болашақ" жобасы аясында,⠀ "Өркен-ниет" қоғамдық қорының ұйымдастыруымен кәсіптік бағдар беру және жоғарғы оқу орындарымен таныстыру мақсатында, аудан және қала мектептерінің 11 сынып оқушыларымен кездесу ұйымдастырылды.

Іс-шара барысында оқушылар институттың әр ғимаратымен, факультетімен, ПОҚ мүшелерімен, студенттер үйімен және білім беру процесімен толық танысып, өз сұрақтарын қойып, жауаптарын алды. Халықаралық Тараз инновациялық институтының Тәрбие және әлеуметтік жұмыстар жөніндегі проректор Г.Қ.Құлабекова оқушылармен еркін форматта сұхбаттасып, көшбасшылық қағидаттары турасында ой бөлісті. ⠀ "Өркен-ниет" қоғамдық қоры ХТИИ ұжымына және институт ректоры Ерболат Байұзақұлына осындай танымдық шараны ұйымдастырып, демеушілік жасағаны үшін үлкен алғысын жеткізді.

2021 жылдың 22-26 сәуір аралығында Семей қаласында Қазақстан Республикасы Тәуелсіздігінің 30 жылдығына орай ұйымдастырылған 2001-2002 жылғы қыздар арасындағы Самбо күресінен өткен чемпионатта Халықаралық Тараз инновациялық институтының ДШ 20-9 тобының студенті Ынтықбай Жансая Дәуренқызы +80 келі салмақ дәрежесінде жүлделі 3 орынды иеленді. Жансаяны осы жеңісімен құттықтаймыз!

2021 жылдың 27 сәуірінде «Филология» кафедрасының ұйымдастыруымен Ұлы ағартушы-ұстаз Ыбырай Алтынсариннің 180 жылдық мерейтойына орай өткізілген «ЫБЫРАЙ АЛТЫНСАРИН ШЫҒАРМАШЫЛЫҒЫ» атты Аймақтық ғылыми-әдістемелік семинар өткізілді.

Аймақтық ғылыми-әдістемелік семинардың басы мақсаты – педагог, жазушы, этнограф, фольклоршы, қоғам қайраткері Ыбырай Алтынсариннің шығармаларын білім алушылар мен педагогтардың арасында кеңінен насихаттауға, Қазақстан қоғамының рухани-адамгершілік және интеллектуалды мәдениетін дамытуға қазіргі білім мен ғылым саласының даму үдерісін кеңінен ашып қарастыруға бағытталған.

Семинарды «Филология» кафедрасының доценті, ф.ғ.к. Пертаева Эльмира Құлибайқызы жүргізді.

Ғылыми-әдістемелік семинарға Халықаралық Тараз инновациялық институтының Ғылым, инновация және халықаралық байланыстар жөніндегі проректоры, э.ғ.д., профессор Тәжібаев Серік Дүйсенәліұлы, «Педагогика» факультетінің деканы, ф.ғ.к., доцент Кужаева Маржан Турегуловна, «Парасат» колледжінің оқытушысы, тарих ғылымдарының магистрі Мақсұт Дауытбаев, №38 орта мектебінің қазақ тілі мен әдебиеті пәнінің мұғалімі Андакулова Динара Манарбековна, «Филология» кафедрасының профессор-оқытушылары, магистранттары мен студенттері қатысты.

Аймақтық ғылыми-әдістемелік семинарда тың баяндамалар жасалып, студенттер тарапынан сұрақтар қойылып, қызу талқыға түсті. Әсіресе, Мақсұт Дауытбаевтың «ХІХ ғасырдағы тарихи әлеуметтік-жағдай және Ыбырай Алтынсарин», «Қазақ тілі мен әдебиеті» мамандығының 3 курс студенті Тилеушова Аселдің «Ы.Алтынсарин дәуірі – қазақ әдебиетінің алтын ғасыры», Усенова Инжайымның «Ы.Алтынсарин шығармалары – балалар әдебиетінің көркем діңгегі», Жунисова Балжанның Ы.Алтынсариннің «Дүние қалай етсең табылар», Андакулова Динараның «Ы.Алтынсариннің өмір жолы», М.Әбілұлының «Рухани жаңғыру және қазақ әдебиеті тарихының кезеңдері» атты баяндамаларын ерекше атап өтуге болады.

Аймақтық ғылыми- әдістемелік семинарда төмендегідей қорытындылар жасалды:

Біріншіден, Ыбырай шығармашылығының ұлттық әдебиет деңгейін биіктетудегі маңызы тереңдете көрсетілді;

Екіншіден, Ыбырай Алтынсарин әңгімелері қазақ жазба прозасы қалыптасуының бастау негізі екендігі сараланды;

Үшіншіден, Ыбырайдың өлеңдері мен әңгімелеріндегі тақырыптық, көркемдік шешім тұрғысындағы үндестік айқындалды;

Төртіншіден, Ы.Алтынсарин шығармашылығы – қазақ балалар жазба әдебиетінің қалыптасуындағы шешуші негіз екендігі дәлелденді;

Бесіншіден, Ыбырай Алтынсарин шығармашылығындағы көркемдік шеберлік сырларын тереңірек талдау арқылы қазақ сөз өнерінің философиялық, гуманистік-ағартушылық, эстетикалық мазмұны жан-жақты көрсетілді.

Баяндамашылар сертификаттармен марапатталды.